ಬ್ಲಾಗ್ ಎಂಬ ಮಾಯಾಜಾಲದಲ್ಲಿ ನನ್ನ ಹೆಜ್ಜೆಗಳು!!

ಬಳ್ಳಾರಿಯ ಪಾದಯಾತ್ರೆ

2010-08-09T18:02:00.000-07:00

ಕಾಂಗ್ರೆಸ್ ನ ಪಾದಯಾತ್ರೆ ಬಗ್ಗೆ ಕೇಳಿ ಕೇಳಿ ನಮ್ಮ ಅಣ್ಣಾವ್ರ ಒಂದು ಹಾಡನ್ನು ಸ್ವಲ್ಪ ತಿರುಚಿ ಹೀಗೆ ಮಾಡಿದ್ದೇನೆ...

ಗುಟ್ಟೊಂದ ಹೇಳುವೆ ಬಳ್ಳಾರಿಯ ಮಕ್ಕಳೇ
ಕೊಟ್ಟಿದ್ದು ಸೊನ್ನೆ ಬಚ್ಚ್ಹಿಟ್ಟಿದ್ದು ರೆಡ್ಡಿಗಳಿಗೆ

ಗಣಿ ಹಣವು ಹೇಳಿದಂತೆ ನೀನೆಂದು ಕೇಳಬೇಡ
ದಾಸನಾಗಿ ರೆಡ್ಡಿಗೆ ನೀನೆಂದು ಬಾಳಬೇಡ

ಗುಟ್ಟೊಂದ ಹೇಳುವೆ ಬಳ್ಳಾರಿಯ ಮಕ್ಕಳೇ
ಕೊಟ್ಟಿದ್ದು ಸೊನ್ನೆ ಬಚ್ಚ್ಹಿಟ್ಟಿದ್ದು ರೆಡ್ಡಿಗಳಿಗೆ

ಸಿದ್ದು-ಡಿಕೆಶಿ-ಪಾಂಡೆ ಇವರ ಪಾದಯಾತ್ರೆ ವೀಡಿಯೊ
ದಿಲ್ಲಿಯಲ್ಲಿ ಸೋನಿಯಾ ಎ.ಸಿ ಯಲ್ಲಿ ಕೂತು ನೋಡುತಿಹಳು

ಗುಟ್ಟೊಂದ ಹೇಳುವೆ ಬಳ್ಳಾರಿಯ ಮಕ್ಕಳೇ
ಕೊಟ್ಟಿದ್ದು ಸೊನ್ನೆ ಬಚ್ಚ್ಹಿಟ್ಟಿದ್ದು ರೆಡ್ಡಿಗಳಿಗೆ

ಸಿದ್ದು ಡಿಕೆಶಿ ಯಂತೆ ನಿಮ್ಮಲ್ಲಿ ಯಾರು ಇಹರೋ
ಸೋನಿಯಾ ಪ್ರಿಯಾಂಕ ನಿಮ್ಮಲ್ಲಿ ಯಾರೊ

ಗುಟ್ಟೊಂದ ಹೇಳುವೆ ಬಳ್ಳಾರಿಯ ಮಕ್ಕಳೇ
ಕೊಟ್ಟಿದ್ದು ಸೊನ್ನೆ ಬಚ್ಚ್ಹಿಟ್ಟಿದ್ದು ರೆಡ್ಡಿಗಳಿಗೆ

ಕನ್ನಡಿಯ ಮುಂದೆ ಒಂದು ಕ್ಷಣ..

2009-11-27T08:46:00.000-08:00

ಮೊಟ್ಟ ಮೊದಲು ಮುಖವನ್ನು ತೋರಿದ ಕನ್ನಡಿ
ಅಂದು ತೋರಿದ ಮುಖ ಇಂದು ತೋರಲು ಒಲ್ಲೆಯೆನ್ನುವ ಕನ್ನಡಿ..
ಎಲ್ಲರ ಮುಖಗಳನ್ನು ತನ್ನಲ್ಲಿ ಹಿಡಿದಿಟ್ಟುಕೊಳ್ಳುವ ಕನ್ನಡಿ
ಎಷ್ಟು ಮುಖಗಳಿದ್ದರೂ ಮರೆಮಾಚಿ ಒಂದೇ ಮುಖ ತೋರುವ ಕನ್ನಡಿ..
ನನ್ನ ಬಿಟ್ಟು ನೀನು ಇರಬಲ್ಲೆಯಾ ಎಂದು ಕೇಳುವ ಕನ್ನಡಿ
ನಿನ್ನ ನೀ ನೋಡಲು ನಾ ಬೇಕೆ ಬೇಕು ಎಂದು ಅಣಕಿಸುವ ಕನ್ನಡಿ...
ಮುಖದ ಅಂದವನ್ನು ನೋಡಲು ಬೇಕು ಕನ್ನಡಿ
ಮನದ ಕೊಳೆಯನ್ನು ತೋರಲು ಬೇಕೆ ಕನ್ನಡಿ ಒಳಗೆ ಕನ್ನಡಿ...

ಕನ್ನಡ ಭಾಷೆ ಮತ್ತು ಕನ್ನಡ ರಾಜ್ಯೋತ್ಸವ!

2009-11-22T18:49:00.000-08:00

ಆ ಹುಡುಗ ಆರನೆಯ ತರಗತಿಯಲ್ಲಿ ಓದುತಿದ್ದ. ಅಪ್ಪ ಅಮ್ಮನ ಏಕೈಕ ಪುತ್ರ. ಅಪ್ಪ ಅಮ್ಮ ಇಬ್ಬರು ಅಪ್ಪಟ ಕನ್ನಡಿಗರು ಮತ್ತು ತುಂಬ ವಿದ್ಯಾವಂತರು. ಅಪ್ಪ ಖಾಸಗಿ ಕಂಪನಿಯಲ್ಲಿ ಉನ್ನತ ಹುದ್ದೆಯಲ್ಲಿದ್ದರು. ಮಗನನ್ನು ಬಹಳ ಮುದ್ದಿನಿಂದ ಬೆಳೆಸಿದ್ದರು. ಈತ ಮಗುವಾಗಿದ್ದಾಗ ಮಾತು ಬಂದಿದ್ದೆ ತುಂಬ ತಡವಾಗಿ. ತುಂಬ ಚೂಟಿಯಾದರೂ ನಾಲ್ಕು ವರ್ಷವಾದರೂ ಕೂಡ ಅಪ್ಪ-ಅಮ್ಮ ಎಂಬ ಎರಡು ಶಬ್ದಗಳು ಕೂಡ ಸರಿಯಾಗಿ ಬರುತ್ತಿರಲಿಲ್ಲ. ಇವನ ವಯಸ್ಸಿನ ಬೇರೆ ಮಕ್ಕಳು ಆಗಲೇ ಡ್ಯಾಡಿ-ಮಮ್ಮಿ ಎನ್ನಲು ಕೂಡ ಕಲಿತಿದ್ದರು. ಹೀಗಾಗಿ ಅವನು ಅಪ್ಪ-ಅಮ್ಮ ಎಂದು ಸರಿಯಾಗಿ ಕರೆಯಲು ಕಲಿತಾಗ ಇವರಿಗೆ ಸ್ವರ್ಗಕ್ಕೆ ಮೂರೇ ಗೇಣು! ಅಪ್ಪ-ಅಮ್ಮ ಎಂದು ಅವನಿಂದ ಮತ್ತೆ ಮತ್ತೆ ಕೇಳಿ ಆನಂದ ಪಟ್ಟಿದ್ದರು. ದೇವರ ದಯೆಯಿಂದ ಹುಡುಗ ತುಂಬಾ ಚೂಟಿ ಮತ್ತು ಬುದ್ದಿವಂತನಾಗಿದ್ದರಿಂದ ನಂತರ ಮಾತನಾಡುವುದನ್ನು ಬಲು ಬೇಗನೆ ಕಲಿತನು. ಮಗ ಚೆನ್ನಾಗಿ ಆಂಗ್ಲ ಭಾಷೆ ಕಲಿಯಬೇಕೆಂದು ಪ್ರತಿಷ್ಟಿತ ಕಾನ್ವೆಂಟ್ ಗೆ ಸೇರಿಸಿದರು. ಸೇರಿದ ಮೊದಲ ದಿನವೇ ಮನೆಗೆ ಬಂದು Daddy-Mummy ಎಂದು ಕರೆಯಲು ಆರಂಭಿಸಿದನು. ಇವನ ಅಪ್ಪ-ಅಮ್ಮನ ಆನಂದಕ್ಕೆ ಪಾರವೇ ಇರಲಿಲ್ಲ. ಅಪ್ಪ-ಅಮ್ಮ ಎಂದು ಕರೆಯಲು ೪ ವರ್ಷ ತಗೆದುಕೊಂಡ ಇವನು ಶಾಲೆಯಲ್ಲಿ ಮೊದಲ ದಿನವೇ Daddy-Mummy ಎನ್ನಲು ಕಲಿತಿದ್ದು ಆವರ ಸಂತೋಷ ಇಮ್ಮಡಿಯಾಗಲು ಕಾರಣವಾಗಿತ್ತು. ಅಂದಿನಿಂದ ಅಪ್ಪ-ಅಮ್ಮನ ಜಾಗದಲ್ಲಿ Daddy-Mummy ಬಂದು ಕುಳಿತುಕೊಂಡಿತು. ಹುಡುಗ ಕ್ಲಾಸಿನಲ್ಲಿ ಓದಿನಲ್ಲಿ ಎಲ್ಲರಿಗಿಂತ ಮುಂದು. ಹೀಗಾಗಿ ಸಹಜವಾಗಿ ಎಲ್ಲ ಟೀಚರ್ ಗಳ ಅಚ್ಚುಮೆಚ್ಚು. ಹೀಗೆ ೩-೪ ವರ್ಷ ಸಾಗಿತು. ಹುಡುಗ ಈಗ ೫ ನೇ ತರಗತಿಯಲ್ಲಿದ್ದನು. ಒಂದು ದಿನ ಇದ್ದಕ್ಕಿದ್ದಂತೆ Daddy-Mummy ಬಿಟ್ಟು Dad-Mom ಅನ್ನಲು ಶುರು ಮಾಡಿದ್ದನು. ಕೇಳಿದರೆ ಕ್ಲಾಸಿನಲ್ಲಿ ಅವನ ಸಹಪಾಟಿಗಳೆಲ್ಲ ಅವರ ತಂದೆ-ತಾಯಂದಿರನ್ನು ಹೀಗೆ ಕರೆಯುತ್ತಾರೆಂದು ಹೇಳಿದನು. ಹೀಗೆ ಡ್ಯಾಡಿ-ಮಮ್ಮಿಗೆ ಡ್ಯಾಡ್-ಮಾಮ್ ಎಂದು ಬಡ್ತಿ ಸಿಕ್ಕಿತು! ಮಗನ ಬುದ್ದಿವಂತಿಕೆಯನ್ನು ನೋಡಿ ಇವನ ಅಮ್ಮ ಮನಸ್ಸಿನಲ್ಲೇ ಎಲ್ಲಾ ದೇವರುಗಳಿಗೆ ವಂದಿಸಿದರು! ಮನೆಯಲ್ಲಿ ಮಗನ ಜೊತೆ ಮಾತುಗಳೆಲ್ಲ ಬರೀ ಆಂಗ್ಲ ಭಾಷೆಯಲ್ಲೇ ನಡೆಯುತ್ತಿತ್ತು. ಹೀಗೆ ಒಂದು ದಿನ ಮಗನು ಅಪ್ಪ-ಅಮ್ಮನ ಬಳಿ ಬಂದು - "Dad-Mom, There is kannada speech competition for kannada rajyotsava day function. My class teacher has shortlisted my name forr the competition. Can you write one very good speech for me? I have to win first prize!" ಹುಡುಗನ ಅಪ್ಪ ಹೇಳಿದನು- " Dont worry my son, I will write and give you such a speech that you will win nothing but first prize in the competition". ಹುಡುಗನ ಅಪ್ಪ ಅವರ ಕಛೇರಿಯ ಕನ್ನಡ ಸಂಘದ ಕಾರ್ಯದರ್ಶಿಯಾಗಿದ್ದರು ಮತ್ತು ಕನ್ನಡ ಭಾಷೆಯ ಮೇಲೆ ತಕ್ಕ ಮಟ್ಟಿಗೆ ಹಿಡಿತ ಕೂಡ ಇತ್ತು. ಹೀಗಾಗಿ ತಮ್ಮ ಮಗನಿಗೆ ಒಳ್ಳೆಯ ಭಾಷಣವನ್ನೆ ಬರೆದು ಕೊಟ್ಟರು. ಮಗನು ಕೂಡ ಅದನ್ನು ಚೆನ್ನಾಗಿ ಉರು ಹೊಡೆದು ನಿರೀಕ್ಷೆಯಂತೆ ಕನ್ನಡ ರಾಜ್ಯೋತ್ಸವ ದಿನದಂದು ಸ್ಪರ್ಧೆಯಲ್ಲಿ ಮೊದಲ ಪ್ರಶಸ್ತಿ ಗಿಟ್ಟಿಸಿದನು. ಮಗನ ಭಾಷಣ ಕೇಳಿ ಅಲ್ಲಿದ್ದ ಎಲ್ಲರೂ ಇವರ ಮಗನನ್ನು ಹೊಗಳಿದ್ದೇ ಹೊಗಳಿದ್ದು. ಹುಡುಗನ ಅಪ್ಪ ಅವನ ಅಮ್ಮನ ಕಿವಿಯಲ್ಲಿ - "ಮುಂದಿನ ವಾರ ನಮ್ಮ ಕನ್ನಡ ಸಂಘದ ಕಾರ್ಯಕ್ರಮದಲ್ಲಿ ಕೂಡ ಇವನ ಭಾಷಣ ಮಾಡಿಸಬೇಕು" ಎಂದು ಉಸುರಿದರು. ಕೊನೆಯಲ್ಲಿ ಕಾರ್ಯಕ್ರಮದ ಸಂಘಟಕರು ಪ್ರಶಸ್ತಿಯನ್ನು ಕೊಡಲು -" May I call upon ..... to come up and collect first prize for kannada speech competition ....." ಎಂದು ಹೇಳುವಾಗ ಕುವೆಂಪುರವರ " ಜೈ ಭಾರತ ಜನನಿಯ ತನುಜಾತೆ, ಜಯಹೇ ಕರ್ನಾಟಕ ಮಾತೆ..." ಹಾಡು ಸ್ಪೀಕರ್ ನಲ್ಲಿ ಮೊಳಗತೊಡಗಿತು ಮತ್ತು ಕನ್ನಡ ಬಾವುಟವು ಗಾಳಿಗೆ ಪಟ ಪಟ ಪಟ ಎಂದು ಬಡಿದುಕೊಳ್ಳುತಿತ್ತು..

ಗೌರವ

2009-07-26T16:33:00.001-07:00

ಶಾಲೆಯಲ್ಲಿ ಕೊಡಬೇಕು ಮಿಸ್ಸಿಗೆ ಗೌರವ
ಕಾಲೇಜಲ್ಲಿ ಕೊಡಬೇಕು ಮೇಡಮ್ಮಿಗೆ ಗೌರವ
ಈಗ ಆಫೀಸಲ್ಲಿ ಕೊಡಬೇಕು ಲೇಡಿ ಬಾಸಿಗೆ ಗೌರವ!

ಚಿಂತೆಯೆಂಬ ಸಂತೆ

2009-07-26T16:27:00.000-07:00

ಆಗಸದೆಡೆಗೆ ಮುಖ ಮಾಡಿದ ರೈತರಿಗೆ ಮಳೆಯ ಚಿಂತೆ
ಹೊಟ್ಟೆಯ ಮೇಲೆ ಬೀಳುವ ತಣ್ಣೀರ ಬಟ್ಟೆಯ ಚಿಂತೆ
ಬಿತ್ತನೆ ಮಾಡಲು ಹೊರಟ ರೈತರಿಗೆ ಗೊಬ್ಬರದ ಚಿಂತೆ
ಬೆನ್ನಿನ ಮೇಲೆ ಬೀಳುವ ಸರ್ಕಾರದ ಲಾಟಿ ಏಟಿನ ಚಿಂತೆ
ದಿನಸಿ ಕೊಳ್ಳುವ ಜನರಿಗೆ ಗಗನಕ್ಕೇರಿರುವ ಬೆಲೆಗಳ ಚಿಂತೆ
ಇಳಿಯುತ್ತಿರುವ ಕೋಟಿನ ಜೇಬುಗಳ ಭಾರದ ಚಿಂತೆ
ಸದನದಲ್ಲಿರುವ ನಾಯಕರಿಗೆ ಪರರ ಕಾಲೆಳೆಯುವ ಚಿಂತೆ
ಯಾರು ಸತ್ತರೇನು ನಾವು ಬದುಕಿದರೆ ಸಾಕೆನ್ನುವ ಚಿಂತೆ

ಕುಡಿತದ ಚಟ!

2009-07-17T18:35:00.000-07:00

ಬಾರು ಎಂಬ ಎರಡಕ್ಷರವನ್ನು ಹೊಕ್ಕಿ, ದುಡ್ಡು ಎಂಬ ಎರಡಕ್ಷರವನ್ನು ಬೋಳಿಸಿ
ಬೀರು-ವಿಸ್ಕಿ ಎಂಬ ಎರಡಕ್ಷರವನ್ನು ಏರಿಸಿ, ನಿಶೆ ಎಂಬ ಎರಡಕ್ಷರದಲ್ಲಿ ತೇಲಿ
ಮೋರಿ ಎಂಬ ಎರಡಕ್ಷರದಲ್ಲಿ ಬಿದ್ದು ಹೊರಳಿ, ನಿದ್ದೆ ಎಂಬ ಎರಡಕ್ಷರದ ದೇವಿಯನ್ನು ಅಪ್ಪಿ
ಕೊನೆಗೆ ಮನೆ ಎಂಬ ಎರಡಕ್ಷರವನ್ನು ಮುಟ್ಟುವುದೇ ಈ ಚಟ ಆನ್ನೋ ಎರಡಕ್ಷರದ ಮಹಿಮೆ!

ಬಕಾಸುರನೆಂಬ ನುಂಗಣ್ಣ!

2009-07-11T10:40:00.000-07:00

ಆ ಮಹಾಭಾರತದಲ್ಲಿ ಇರುವನು ಒಬ್ಬ ಬಕಾಸುರನೆಂಬ ನುಂಗಣ್ಣನು
ಈ ಭಾರತದಲ್ಲಿ ಇರುವರು ಸಾವಿರಾರು ಬಕಾಸುರರೆಂಬ ನುಂಗಣ್ಣರು

ಆ ನುಂಗಣ್ಣನು ನುಂಗಲು ತೆರೆದರೆ ಒಂದೇ ಬಾಯಿ
ಈ ನುಂಗಣ್ಣರು ನುಂಗಲು ತೆರೆದರೆ ಮೈಯೆಲ್ಲ ಬಾಯಿ

ಆ ಬಕಾಸುರನಿಗೆ ನುಂಗಲು ಬೇಕು ಬಿಸಿ ಬಿಸಿಯಾದ ಖಾದ್ಯ ಭಕ್ಷ್ಯಗಳು
ಈ ಬಕಾಸುರರಿಗೆ ನುಂಗಲು ಬೇಕು ಗರಿ ಗರಿಯಾದ ನೋಟಿನ ಕಂತೆಗಳು

ಆ ಬಕಾಸುರನಿಂದ ಬರಿದಾದವು ಜನರ ಬೇಳೆ ಕಾಳುಗಳು
ಈ ಬಕಾಸುರರಿಂದ ಬರಿದಾದವು ಜನರ ಜೇಬುಗಳು

ಆ ಬಕಾಸುರನು ಹೀರಿದನು ದಿನಕ್ಕೆ ಒಬ್ಬನ ರಕ್ತ
ಈ ಬಕಾಸುರರು ಹೀರುವರು ದಿನಕ್ಕೆ ಸಹಸ್ರ ಜನರ ರಕ್ತ

ಆ ಬಕಾಸುರನನ್ನು ಸಂಹರಿಸಿದವು ಭೀಮನ ಎರಡು ಕೈಗಳು
ಈ ಬಕಾಸುರರನ್ನು ಸಂಹರಿಸಲು ಬೇಕು ಅಂತಹ ಸಹಸ್ರಾರು ಕೈಗಳು

ಆ ಮಹಾಭಾರತದ ಬಕಾಸುರನಿಗೆ ಇರಲಿಲ್ಲ ಯಾವ ರಕ್ಷಕರು
ಈ ಭಾರತದ ಬಕಾಸುರರಿಗೆ ಇದ್ದಾರೆ ಸರ್ಕಾರದ ತುಂಬ ರಕ್ಷಕರು

ಸೈಕಲ್!

2009-07-10T17:48:00.001-07:00

ಇಂದು ಇಲ್ಲಿ ಮಕ್ಕಳು ಸೈಕಲ್ ಹೊಡೆಯುವುದನ್ನು ನೋಡಿ ಹಾಗೆ ಬರೆದ ಸಾಲುಗಳು!

ಬಯಸದೆ ಪಡೆದ ಸೈಕಲ್, ಅದು ಮೂರು ಚಕ್ರದ ಆಟಿಕೆ ಸೈಕಲ್
ಕಾಡಿ ಬೇಡಿ ಪಡೆದ ಸೈಕಲ್, ಅದು ಎರಡು ಚಕ್ರದ ಹೀರೋ ಸೈಕಲ್
ಬಯಸಿ ಆರಿಸಿ ಪಡೆದ ಸೈಕಲ್, ಅದು ನನ್ನ ಹೋಂಡ ಮೋಟಾರ್ ಸೈಕಲ್!

ಹಾವಿನ ಜೊತೆ ಸಲ್ಲಾಪವೇ?

2009-07-08T06:55:00.000-07:00

ಏನು ಗುರೂ ಇವನು.. ಒಳ್ಳೆ ಸ್ನೇಕ್ ಶ್ಯಾಮ್ ತರ ಏನೋ scope ತಗೋತಾ ಇದ್ದಾನೆ ಅಂತ ಅನ್ಕೋತೀರ? ಮೈಸೂರಿನಲ್ಲಿರುವವರು ಖಂಡಿತವಾಗಿ ಇವನ ಹೆಸರನ್ನು ಕೇಳಿರಬೇಕು!
ಹಾವಿನ ದ್ವೇಷ ಹನ್ನೆರಡು ವರುಷ, ನನ್ನ ರೋಷ ನೂರು ವರುಷ!! ಅನ್ನೊ ಹಾಡು ನನಪಾಗುತ್ತಿದೆ ಅಲ್ಲವೇ? ನನ್ನ ಆಫೀಸಿನಲ್ಲಿ ಸುಮಾರು ೨ ತಿಂಗಳುಗಳ ಹಿಂದೆ ನನ್ನ ಕ್ಯೂಬ್ ನಲ್ಲಿ ಅಚಾನಕ್ಕಾಗಿ ಕಾಣಿಸಿಕೊಂಡ ಇದು ಯಾವ ತಳಿಯ ಹಾವು ಎಂದು ನಿಮ್ಮಲ್ಲಿ ಯಾರಾದರೂ ಬಲ್ಲಿರಾ??

ಬೇಸಿಗೆ ರಜಗಳು!

2009-07-07T22:28:00.000-07:00

ಯಾವ ಗುಲ್ಡು ನನ್ಮಗ ಇವನು, ಬೇಸಿಗೆ ಮುಗಿದು ಆಗಲೇ ಮಳೆಗಾಲ ಬಂದು ಒಂದು ತಿಂಗಳ ಮೇಲಾಯ್ತು. ಈಗ ಏನೋ ಬೇಸಿಗೆ ರಜ ಅಂತ ಕುಯ್ತಾ ಇದಾನೆ ಅಂತ ಅನ್ಕೋಬೇಡಿ! ಇಲ್ಲಿ ಅಮೆರಿಕೆಯಲ್ಲಿ ಬೇಸಿಗೆ ಅಂತ ಶುರು ಆಗೋದೆ ಜೂನ್ ಕೊನೆಯ ವಾರದಲ್ಲಿ. ವೀಕೆಂಡಿನಲ್ಲಿ ಹಾಗೆ ಸಂಜೆ ೭ ಗಂಟೆಗೆ ಕಿಟಕಿ ಹೊರಗೆ ಕಣ್ಣು ಹಾಯಿಸ್ತಾ ಇದ್ದಾಗ ಮೆಲ್ಲಗೆ ಮನಸು ನನ್ನ ಬಾಲ್ಯದ ೩-೫ ನೆಯ ಕ್ಲಾಸ್ ನ ಬೇಸಿಗೆ ರಜಗಳ ಕಡೆಗೆ ಜಾರಿತು. ನಾವು ಆಡ್ತಾ ಇದ್ದ ಆಟಗಳು, ಮಾಡ್ತಾ ಇದ್ದ ಕಪಿ ಚೇಷ್ಟೆಗಳು ಎಲ್ಲಾ ಒಳ್ಳೆ ಸಿನಿಮಾದಲ್ಲಿ ತೋರಿಸೊ ಫ್ಲಾಶ್ ಬಾಕ್ ತರ ಬರೋದಕ್ಕೆ ಶುರು ಆಯ್ತು. ಆಹಾ.. ದಿನಗಳು ಅಂದ್ರೆ ಆ ದಿನಗಳು ಅಂತ ಹಾಗೆ ಸಣ್ಣಗೆ ಮುಖದ ಮೇಲೆ ಮುಗುಳ್ನಗೆ ಮೂಡಿತು! ಈಗಲೂ ನೆನಪಿದೆ. ಮಾರ್ಚ್ ಕೊನೆಯ ವಾರದಲ್ಲಿ ಪರೀಕ್ಷೆ ಮುಗೀತು ಅಂದ್ರೆ ನಮ್ಮ ಮಜಾ ಶುರು. ಬೆಳಿಗ್ಗೆ ನನ್ನ ಅಪ್ಪ-ಅಮ್ಮ ಆಫೀಸಿಗೆ ಹೋಗೋದೆ ಕಾಯ್ತಾ ಕೂತಿರ್ತ್ತಿದ್ದೆ. ನಮ್ಮ ಮನೆಯಲ್ಲಿ ಇಬ್ಬರೂ ಕೆಲಸಕ್ಕೆ ಹೋಗುತ್ತಿದ್ದರು! ಹೋಗೋವಾಗ ಮನೆ ಹೊಸ್ತಿಲು ಸಂಜೆ ೫ ಗಂಟೆ ತನಕ ದಾಟಬಾರದು. ಅಲ್ಲಿಯ ತನಕ ಮನೆಯ ಒಳಗೆ ಕೇರಂ,ಚೆಸ್,ಹಾವು ಏಣಿ,ಚೌಕಾಬಾರ ಆಟ ಆಡ್ಕೊಳ್ಳಿ, ಸಂಜೆ ೫ ಗಂಟೆ ಆದಮೇಲೆ ಬಿಸಿಲು ಇಳಿದ ಮೇಲೆ ಹೊರಗೆ ಆಡ್ಕೊಳ್ಳಿ ಅಂತ ಅದೆಷ್ಟೇ ಬಾರಿ ಹೇಳಿದ್ರು, ಅದೇನೋ ಹೇಳ್ತಾರಲ್ಲ ಕೋಣನ ಮುಂದೆ ಕಿನ್ನರಿ ಬಾರಿಸಿದರು ಅಂತ ಹಾಗೆ ನಾನು. ಅವರು ಬೆಳಿಗ್ಗೆ ೯ ಗಂಟೆಗೆ ಹೊರಟು ನಮ್ಮ ಮನೆಯ ಕ್ರಾಸ್ ದಾಟಿ ಕಣ್ಮರೆ ಆದ ಕೂಡಲೆ ನಮ್ಮ ಬೀದಿಯಲಿ ಇದ್ದ ಚಿಳ್ಳೆ ಪಿಳ್ಳೆ ಗ್ಯಾಂಗ್ ನಮ್ಮ ಮನೆಯಲ್ಲಿ ಹಾಜರ್!! ಬೆಳಿಗ್ಗೆ ಬೆಳಿಗ್ಗೆ ಹೊರಗಡೆ ಬೀದೀಲಿ ನಮ್ಮ ಆಟಗಳು ಶುರು! ಐಸ್-ಪೈಸ್ (ಕಣ್ಣಾಮುಚ್ಚಾಲೆ), ಶರಾಪ್-ಕರೆಂಟ್ (ಇದಕ್ಕೆ ಕನ್ನಡದಲ್ಲಿ ಅದೇನು ಹೇಳ್ತಾರೊ ಗೊತ್ತಿಲ್ಲ!), ಕಲ್ಲು-ಮಣ್ಣು,ರಾಮ-ಭೀಮ-ಸೋಮ, ಲಗೋರಿ ಅಂತ ಇನ್ನು ಅದೇನೆನೋ ಆಟಗಳು ಒಂದರ ನಂತರ ಒಂದು ಎಗ್ಗಿಲ್ಲದೆ ಸಂಜೆಯವರೆಗೂ ಸಾಗುತಿತ್ತು. ಅದೆಷ್ಟು ಓದುಗರಿಗೆ ಕಲ್ಲು-ಮಣ್ಣು, ಶರಾಪ್-ಕರೆಂಟ್ ಎಲ್ಲಾ ಗೊತ್ತೊ ನನಗೆ ಗೊತ್ತಿಲ್ಲ. ೮೭-೯೩ ನೆಯ ಇಸವಿ ಆಸು ಪಾಸಿನಲ್ಲಿ ಪ್ರೈಮರಿ ಶಾಲೆ ಓದಿದವರಿಗ ಖಂಡಿತ ಗೊತ್ತಿರಬೇಕು ಅಂತ ಅನ್ಕೊತೀನಿ. ಅದ್ಯಾರು ಈ ಶರಾಪ್-ಕರೆಂಟ್,ಕಲ್ಲು-ಮಣ್ಣು,ರಾಮ-ಭೀಮ-ಸೋಮ ಅಂತ ಈ ಆಟಗಳಿಗೆ ಹೆಸರನ್ನಿಟ್ರರೋ ಆ ಭಗವಂತನೇ ಬಲ್ಲ! ಐಸ್-ಪಸ್ ಅಂತು ನಮಗೆ ಫೇವರೆಟ್. ಏಕೆಂದರೆ ಒಂದು ರೌಂಡ್ ಎಲ್ಲರನ್ನು ಹುಡುಕಿ ಔಟ್ ಮಾಡೊದಿಕ್ಕೆ ದೇವರಾಣೆಗೂ ಸಾಧ್ಯವಾಗುತಾ ಇರಲಿಲ್ಲ ಮತ್ತು ಆಟ ಅಷ್ಟು ಬೇಗ ಮುಗಿಯುತ್ತಿರಲಿಲ್ಲ!! ಅದಕ್ಕೆ ಆಟ ಶುರು ಆಗೋ ಮುಂಚೆ ಅದಕ್ಕೆ ರೂಲ್ಸ್ ಬೇರೆ ಹಾಕ್ತಾ ಇದ್ವಿ. ಮನೆ ಓಳಗೆ ಅವಿತುಕೊಳ್ಳೋ ಹಾಗೆ ಇಲ್ಲ, ನಮ್ಮ ಬೀದಿ ಬಿಟ್ಟು ಪಕ್ಕದ ಬೀದಿಗೆ ಹೋಗುವ ಹಾಗಿಲ್ಲ, ಕೆಲವು ಆಯ್ದ ಮನೆಗಳನ್ನು ಬಿಟ್ಟು ಬೇರೆ ಮನೆಗಳಲ್ಲಿ ಅವಿತುಕೊಳ್ಳೊ ಹಾಗಿಲ್ಲ ಅಂತ!! ಅಪ್ಪಿ ತಪ್ಪಿ ಯಾರಾದ್ರು ಸಿಕ್ಕಿ ಬಿದ್ದು ಔಟ್ ಆದರೆ ಅವನು ಅಲ್ಲಿ ಕೂತ್ಕೊಂಡು ಇನ್ನೊಬ್ಬ ನಮ್ಮನ್ನ ಎಲ್ಲಿ ಎಲ್ಲಿ ಹೋಗಿ ಹುಡುಕುತ ಇದ್ದಾನೆ ಅಂತ ಇಡೀ ಊರಿಗೆ ಕೇಳೋ ಹಾಗೆಲ್ಲ ನಮಗೆ ಸಿಗ್ನಲ್ ಕೊಡ್ತಾ ಇದ್ದ! ನಾವು ಅವಿತುಕೊಳ್ಳೋ ಆ ಜಾಗಗಳು ಎಂಥವು ಅಂದ್ರೆ ಈ C.I.D ಅವರು ಬಂದರೂ ಹುಡುಕುವುದಕ್ಕೆ ಆಗುತ್ತಿರಲಿಲ್ಲ ಅನ್ನ್ಸುತ್ತೆ!! ಪಕ್ಕದ ಮನೆಯಲ್ಲಿ ಗಾಡಿ ನಿಲ್ಲಿಸಿ ಅದಕ್ಕೆ ಕವರ್ ಹಾಕಿದ್ರೆ ಸೈಡ್ ನಿಂದ ಅದರ ಒಳಗೆ ಹೋಗಿ ಅವ್ಸೊಕೊಳ್ಳೊದು, ಮಾಡಿ ಮೆಟ್ಟಿಲುಗಳ ಪಕ್ಕದಲ್ಲಿ ಸಜ್ಜ ಇದ್ದರೆ ಅದರ ಮೇಲೆ ಹತ್ತಿ ಅಲ್ಲಿ ಅವಿತುಕೊಳ್ಳೊದು, ಮನೆ ಹಿಂದೆ ತೊಟ್ಟೀಲಿ ಏನಾದ್ರು ನೀರು ಕಮ್ಮಿ ಇದ್ರೆ ಅದರ ಒಳಗೆ ಇಳಿದು ಅವ್ಸೊಕೊಳ್ಳೊದು, ಎದುರುಗಡೆ ಮಾಡಿ ಮೇಲೆ ಹತ್ತಿ ಕೂತ್ಕೊಳೊದು ಹೀಗೆ ನೂರಾರು ಜಾಗಗಳು ನಮ್ಗೆ!! ಇನ್ನು ಮನೆಯ ಒಳಗೆ ಇದನ್ನು ಆಡಿದ್ರಂತೂ ಕೇಳೋದೆ ಬೇಡ. ಅದರ ಮಜಾನೆ ಬೇರೆ! ಈ ಆಟ ಮುಗೀತು ಇಲ್ಲ ನಮ್ಮಲ್ಲೇ ಏನಾದ್ರು ಕಿತ್ತಾಟ ಶುರು ಆಯ್ತು ಅಂದ್ರೆ ಯಾರೋ ಒಬ್ಬ ಬಾಲ್ ಹಿಡ್ಕೊಂಡು ಬಂದು ರಾಮ ಭೀಮ ಸೋಮ ಇಲ್ಲ ಲಗೋರಿ ಆಟ ಶುರು. ಲಗೋರಿ ಎಲ್ಲರಿಗೂ ಗೊತ್ತು ಅಂತ ಅನ್ಕೊತೀನಿ. ಅದಕ್ಕೆ ರಾಮ ಭೀಮ ಸೋಮ ಬಗ್ಗೆ ಸ್ವಲ್ಪ ಹೇಳ್ತೀನಿ! ರಾಮ ಭೀಮ ಸೋಮ ಅಂತ ಹೇಳಿ ಬೇರೆಯವರಿಗೆ ಗುರಿಯಿಟ್ಟು ಬಾಲನ್ನು ಅವನಿಗೆ ಬೀಳೊ ಹಾಗೆ ರಪ್ ಅಂತ ಎಸೆಯೋದು! ಅದು ಅವನಿಗೆ ಬಿದ್ದರೆ ಔಟ್ ಅಂತ, ಇಲ್ಲ ಅಂದ್ರೆ ಮತ್ತೆ ಬಾಲ್ ಯಾರಿಗೆ ಸಿಗತ್ತೊ ಅವರು ರಾಮ ಭೀಮ ಸೋಮ ಅಂತ ಗುರಿಯಿಟ್ಟು ಎಸೆಯೋದು!! ಟೆನ್ನಿಸ್ ಬಾಲ್ ಆದರೆ ಬೀಳ್ತಾ ಇದ್ದ ಏಟುಗಳು ಸ್ವಲ್ಪ ಪರವಾಗಿಲ್ಲ, ಆದರೆ ಅದು ರಬ್ಬರ್ ಬಾಲ್ ಆಗಿದ್ದರೆ ಚುರು ಚುರು ಅಂತ ೨-೩ ದಿನಗಳ ಕಾಲ ಉರಿಯೋದು ಮತ್ತೆ ಹೊಡೆದವನಿಗೆ ಶಾಪ ಹಾಕ್ತಾ ಇರೊದು! ನಮ್ಮ ಹತ್ತಿರ ಯಾವಾಗಲೂ ಇರ್ತ ಇದ್ದಿದ್ದೆ ರಬ್ಬರ್ ಬಾಲ್ ಯಾಕೆಂದರೆ ಅದೇ ಆಗಿನ ಕಾಲಕ್ಕೆ ಚೀಪ್! ೨-೩ ರೂಪಾಯಿಗಳಿಗೆ ಸಿಗುತಿತ್ತು. ಕಳೆದು ಹೋದರೆ ಇಲ್ಲ ಬೇಗ ಒಡೆದು ಹೋದರೆ ತಲೆ ಕೆಡಿಸಿಕೊಳ್ಳುವುದು ಬೇಕಾಗಿರಲಿಲ್ಲ. ಆದ್ದರಿಂದ ಜೋರಾಗಿ ಬಿದ್ದ ಏಟುಗಳನ್ನು ೨-೩ ದಿನಗಳ ಕಾಲ ಮರೆಯೋ ಹಾಗಿರಲಿಲ್ಲ! ಹೀಗೆ ನನ್ನ ಫ್ಲಾಶ್ ಬಾಕ್ ಯಾವುದೆ ಬ್ರೇಕ್ ಇಲ್ಲದೆ ಓಡುತ್ತಾ ಇರಬೇಕಾದರೆ ನನ್ನ ಲಾಪ್ ಟಾಪ್ ನಲ್ಲಿ " ಕಾಲವನ್ನು ತಡೆಯೋರು ಯಾರೂ ಇಲ್ಲ, ಗಾಳಿಯನ್ನು ಹಿಡಿಯೋರು ಎಲ್ಲೂ ಇಲ್ಲ" ಅನ್ನೊ ದ್ವಾರ್ಕೀಶ್ ಮತ್ತೆ ವಿಷ್ನುವರ್ಧನ್ ಅವರ ಹಾಡು ನನ್ನ ಫ಼್ಲಾಶ್ ಬಾಕ್ ಗೆ ಬ್ರೇಕ್ ಹಾಕಿ ನಾನು ಇರೊ ಕಾಲವನ್ನು ನೆನಪಿಸಿತು! ಒಲ್ಲದ ಮನಸ್ಸಿಂದ ನಿಧಾನಕ್ಕೆ ನನ್ನ ಆಫೀಸ್ ಲಾಪ್ ಟಾಪ್ ತೆರೆದು ಕೆಲಸ ಮಾಡೋದಿಕ್ಕೆ ಶುರು ಮಾಡಿದೆ!

ಚುನಾವಣೆ ಎಂದರೇನು?

2009-07-07T10:22:00.000-07:00

ಚುನಾಯಿತನಾಗಿ ಐದು ವರುಷ ಕಾಣೆ ಆಗುವುದೇ ಚುನಾವಣೆ!
ಇದನ್ನು ಹೀಗೆ ಕೂಡ ಬರೆಯಬಹುದೆ? ಏನಂತೀರ?

ಚುನಾಯಿತ
ನಾಗಿ ಐದು
ವರುಷ ಕಾ
ಣೆ ಆಗುವುದೇ ಚುನಾವಣೆ!

"ನಾನಿರುವುದೇ ನಿಮಗಾಗಿ" ಎಂಬ ಹಾಡು!

2009-07-05T17:05:00.000-07:00

ಸ್ನೇಹಿತರೇ, ನೀವೆಲ್ಲರೂ ನಮ್ಮ ಅಣ್ಣಾವ್ರ "ಮಯೂರ" ಸಿನಿಮಾ ನೋಡಿರಬಹುದು. ನಾನು ಬಹಳ ಇಷ್ಟ ಪಡುವ ಸಿನಿಮಾ. ೧೦೦ ಸಲ ನೋಡಿದರೂ ಬೇಸರವಾಗುವುದಿಲ್ಲ ಅಲ್ಲವೆ! ಹಾಗೆಯೇ ಇದರಲ್ಲಿ "ನಾನಿರುವುದೇ ನಿಮಗಾಗಿ" ಅನ್ನೋ ಹಾಡಿದೆ. ತುಂಬಾ ಸೊಗಸಾಗಿರೊ ಹಾಡು. ಎಲ್ಲಾ ಎಫ್.ಎಂ ಗಳಲ್ಲಿ ಸಾಮಾನ್ಯವಾಗಿ ಯಾವಾಗಲೂ ಬರುತ್ತಿರುತ್ತದೆ. ಇದರಲ್ಲಿ ಏನಪ್ಪ ವಿಶೇಷ ಅಂತ ಕೇಳ್ತೀರಾ? ಹಿ..ಹೀ..ಅದಕ್ಕೆ ಈ ಬ್ಲಾಗನ್ನು ಬರಯುತ್ತಿರುವುದು. ನನ್ನಂತಹ ಯಾರೋ ಒಬ್ಬ ಭೂಪ ಈ ಹಾಡಿನ ಸಾಲುಗಳನ್ನು ಸ್ವಲ್ಪ ತಿರುಚಿ ತುಂಬಾ ಹಾಸ್ಯಭರಿತವಾಗಿ ಬರೆದಿದ್ದಾನೆ. ಮೊದಲ ಬಾರಿ ಕೇಳಿದರೆ ಹೊಟ್ಟೆ ಹುಣ್ಣಾಗುವಂತೆ ನಗು ಬರುತ್ತದೆ!! ಇದನ್ನು ನನಗೆ ಎಲ್ಲೊ ಓದಿದ ನೆನಪು ಇಲ್ಲ ಕೇಳಿದ ನೆನಪು. ಆದರೆ ಪೂರ್ತಿ ಹಾಡು ನೆನಪಿಲ್ಲ. ಬಹಳ ದಿನಗಳಿಂದಲೂ ಪೂರ್ತಿ ತಿಳಿಯಬೇಕೆಂಬ ಆಸೆ! ಆದರೆ ಯಾರನ್ನೆ ಕೇಳಿದರೂ ನಾನು ಹೇಳಿದ ಸಾಲುಗಳನ್ನು ಕೇಳಿ ಹೊಟ್ಟೆ ಹುಣ್ಣಾಗುವಂತೆ ನಕ್ಕರೇ ವಿನಾ ಯಾರೂ ಕೂಡ ಇದರ ಮುಂದುವರಿದ ಸಾಲುಗಳನ್ನು ಹೇಳಲಿಲ್ಲ. ಇಂದು ಮತ್ತೆ youtube.com ನಲ್ಲಿ ಈ ಹಾಡನ್ನು ನೋಡಿದೆ. ಸರಿ, ನನ್ನ ಬ್ಲಾಗ್ ನಲ್ಲಿ ಇದನ್ನು ನಿಮ್ಮೊಂದಿಗೆ ಹಂಚಿಕೊಂಡರೆ ನಿಮ್ಮಲ್ಲಿ ಯಾರದರೂ ಇದನ್ನು ಪೂರ್ತಿ ಬಲ್ಲವದಿದ್ದರೆ ನನಗೆ ಹೇಳಬಹುದೇನೋ ಅಂತ ಅನಿಸಿತು! ಹೇಗಿದೆ ಐಡಿಯಾ? ಹಿ.ಹೀ..ಇದನ್ನು ಯಾರದರೂ ಅಣ್ಣಾವ್ರ ಕಟ್ಟಾ ಅಭಿಮಾನಿ ದೇವರುಗಳು ನೋಡಿದರೆ ದಯವಿಟ್ಟು ಒಂದು ಸಲ ನಕ್ಕಿಬಿಡಿ! ಮತ್ತೆ ನನ್ನ ಮೇಲೆ ಕೋಪಿಸಿಕೊಳ್ಳಬಾರದಾಗಿ ವಿನಂತಿ!

ನಾನಿರುವುದೇ ನಿಮಗಾಗಿ
ಬಾರಿರುವುದೆ ನಮಗಾಗಿ!
ಬ್ರಾಂದಿ ಬೇಕೆ, ವ್ಹಿಸ್ಕಿ ಬೇಕೆ
ಕುಡಿಯುವರೆಲ್ಲ ಹಾಯಾಗಿ
ಒಂದೇ ಬಾರಿನ ಕುಡುಕರು ನಾವು
ಸೋದರರಂತೆ ನಾವೆಲ್ಲಾ!!

ಈಗ ಯಾರದ್ರೂ ಇದರ ಮುಂದುವರಿದ ಸಾಲುಗಳನ್ನು ಹೇಳಬೇಕಾಗಿ ವಿನಂತಿ!!!

ದೋಣಿ!

2009-07-04T18:30:00.001-07:00

ಕಂಡಿತು ನೀರಿನಲಿ ಒಂದು ದೋಣಿ
ತಂದಿತು ನೆನಪಿಗೆ ನನ್ನ ಬಾಲ್ಯದ ದೋಣಿ
ನಾನು ತೇಲಿ ಬಿಟ್ಟ ಒಂದು ಕಾಗದದ ದೋಣಿ!

ಗ್ಲಾಸು

2009-07-04T18:23:00.000-07:00

ಶಾಲೆಯ ದಿನಗಳಲಿ ಎತ್ತುತ್ತಿದ್ದೆ ಕಾಂಪ್ಲಾನ್ ಗ್ಲಾಸು
ಕಾಲೇಜಿನ ದಿನಗಳಲಿ ಎತ್ತುತ್ತಿದ್ದೆ ಬೀರಿನ ಗ್ಲಾಸು
ಈಗ ಎತ್ತುತ್ತಿರುವೆ ಬರೀ ವ್ಹಿಸ್ಕಿಯ ಗ್ಲಾಸು!

ಚಂಚಲ ಮನಸು

2009-07-04T17:27:00.000-07:00

ಇತ್ತ ಮನಸು ಹೇಳಿತು ನಡೆ ಮನೆಗೆ
ಅತ್ತ ಮನಸು ಹೇಳಿತು ನಡೆ ಸಿನಿಮಾಗೆ
ಕೊನೆಗೆ ಮನಸು ಹೇಳಿತು ನಡೆ ಬಾರಿಗೆ!

ಕಂ(ಹಿಂ)ಗ್ಲಿಷ್

2009-07-04T10:49:00.001-07:00

ಕನ್ನಡದಲ್ಲಿ ಬರೆದಿದ್ದು ಕಂಗ್ಲಿಷ್ ಎಂದು ಹೇಳಿದರೆ
ಹಿಂದಿಯಲಿ ಬರೆದಿದ್ದು ಹಿಂಗ್ಲಿಷ್ ಎಂದು ಹೇಳಿದರೆ
ಇಂಗ್ಲಿಷ್ ನಲಿ ಬರೆದಿದ್ದು ರಬ್ಬಿಷ್ ಎಂದು ಹೇಳಬಹುದೆ!

ಪ್ರೀತಿ-ಪ್ರೇಮ!

2009-07-03T19:03:00.000-07:00

ಮನೆಯ ಒಳಗಿದ್ದೆ "ಪ್ರೇಮ" ದ ಜೊತೆ
ಮನೆಯ ಹೊರಗಿದ್ದೆ "ಪ್ರೀತಿ"ಯ ಜೊತೆ
ಕೊನೆಗೆ ಸಿಕ್ಕಿತು "ಡೈವೋರ್ಸ್"ನ ಜೊತೆ!

ಶ್ವಾನ ಸಾಕುವುದು ಬಲು ಕಷ್ಟ!!

2009-07-03T16:47:00.000-07:00

ಏನಪ್ಪ ಇದು ಯಾವ ಬಲು ಕಷ್ಟದ ಕೆಲಸ ಅಂತ ಕೇಳುತ್ತೀರಾ? ಹೆ..ಹೇ..ನಾನು ಹೇಳ ಹೊರಟಿರುವುದು ನಮ್ಮ ಭಾರತ ದೇಶದ ಶ್ವಾನ(ನಾಯಿ)ಗಳ ಬಗ್ಗೆಯಲ್ಲ.. ಅಮೆರಿಕ ಎಂಬ ಪರದೇಶದ ಶ್ವಾನಗಳ ಬಗ್ಗೆ! ನಾನು ಉದರ ಪೋಷಣೆಯ ಸಲುವಾಗಿ ಇಲ್ಲಿ ಮೊದಲ ಬಾರಿ ಬಂದಾಗ ಹೀಗೆ ಒಂದು ಅಪಾರ್ಟಮೆಂಟ್ ಬಾಡಿಗೆಗೆ ಹಿಡಿದು ಇಲ್ಲಿನ ರೀತಿ ನೀತಿಯ ಬಗ್ಗೆ ತಿಳಿದುಕೊಳ್ಳೂತ್ತಿದ್ದ ಕಾಲ. ನನಗೆ ಸಿಕ್ಕಾಪಟ್ಟೆ ಕುತೂಹಲ ಹುಟ್ಟಿದ್ದು ಜನ ಅವರು ಸಾಕಿದ ಶ್ವಾನ ಹಿಡಿದುಕೊಂಡು ಹೊರಟಾಗ! ಏಕೆಂದರೆ ಈ ಶ್ವಾನಗಳು ಅದೆಲ್ಲಿ ತಮ್ಮ ಮಲ ಮೂತ್ರ ವಿಸರ್ಜಿಸುತ್ತವೆ ಅನ್ನೊ ತಿಳಿಯೋ ಕುತೂಹಲ ನನಗೆ! ನಾನು ಕೂಡ ತುಂಬಾ ಪ್ರಾಣಿಪ್ರಿಯ. ಮೈಸೂರಿನ ನಮ್ಮ ಮನೆಯಲ್ಲೂ ಸುಮಾರು ೧೫ ವರ್ಷಗಳಿಂದ ನಾಯಿಯನ್ನು ಸಾಕುತ್ತಿದ್ದೇವೆ.ಈಗ ಸದ್ಯಕ್ಕೆ ಒಂದು ಲ್ಯಾಬ್ರಡಾರ್ ಎಂಬ ತಳಿ ಇದೆ. ತುಂಬಾ ಮುದ್ದಾದ ನಾಯಿ.ಅದರ ಬಗ್ಗೆ ಮತ್ತೊಮ್ಮೆ ವಿವರವಾಗಿ ಬರೆಯುವೆ! ಅದರ ಊಟ ಆದ ಮೇಲೆ ಅದನ್ನ ನಮ್ಮೆ ಮನೆಯ ರಸ್ತೆಯ ಕೊನೆಯಲ್ಲಿ ಇರೊ ಖಾಲಿ ಸೈಟುಗಳಲ್ಲಿ ಬಿಟ್ಟರೆ ಆರಾಮಾಗಿ ೧೫ ನಿಮಿಷ ಎಲ್ಲಾ ಮೂಸಿ ನೋಡಿ ಕೊನೆಗೆ ತನ್ನ ಕೆಲಸಗಳನ್ನು ಮುಗಿಸಿಕೊಂಡು ಬರುತಿತ್ತು! ಕೆಲವೊಮ್ಮೆ ರಸ್ತೆಯ ಪಕ್ಕದಲ್ಲೆ ಶಿವಾ ಅಂತ ಕುಕ್ಕುರಗಾಲು ಹಾಕಿ ಕುಳಿತುಬಿಡುತಿತ್ತು..ಪಾಪ ಅದಕ್ಕೂ ಕೆಲವೊಮ್ಮೆ urgent ಆಗುತ್ತೆ ಅಲ್ಲವೆ!! ಕೆಲವೊಮ್ಮೆ ನನಗೂ ಆ ಸೈಟುಗಳ ಒಳಗೆ ಅದರ ಜೊತೆ ತಿರುಗಾಡೊ ಯೋಗ!! ಅಲ್ಲಿನ ಪರಿಮಳ ಏನು ಕೇಳ್ತೀರಾ!ಆಹಾ! ಆದರೆ ಇಲ್ಲಿ ಅಮೆರಿಕ ರಸ್ತೆಗಳ ಮೇಲೆ ನಾವು ಉಗಿದರೇನೆ ಜನ ಕೆಲವೊಮ್ಮೆ ದುರು ದುರು ಅಂತ ನೋಡ್ತಾರೆ..ಇನ್ನು ನಾಯಿಯ ಕಕ್ಕ ಎಲ್ಲಾ ಸಾಧ್ಯವಿಲ್ಲದ ಮಾತು ಅಂತ ನನಗೆ ತಿಳಿದಿತ್ತು! ಸರಿ ಅಂತ ನಾನು ಒಮ್ಮೆ ಹೀಗೆ ರಸ್ತೆಯ ಮೇಲೆ ಹೋಗುತ್ತಿರುವಾಗ ತನ್ನ ಮಾಲಿಕನ ಜೊತೆ ಬರುತ್ತಿದ್ದ ಒಂದು ನಾಯಿ ತನ್ನ ಕೆಲಸವನ್ನು ಮಾಡುವದಿಕ್ಕೆ ಕುಳಿತಿದ್ದು ನೋಡಿದೆ. ಆಹಾ..ಸಿಕ್ಕಿತೊ ಚಾನ್ಸು ಅಂತ ಅಲ್ಲೆ ನಿಂತು ಅದನ್ನೆ ಗಮನಿಸುತ್ತ ನನ್ನ ಸ್ನೇಹಿತನಿಗೆ ಒಂದು ಫೋನ್ ಹಚ್ಚಿ ಹರಟ ತೊಡಗಿದೆ! ತನ್ನ ನಾಯಿಯ ಕೆಲಸ ಮುಗಿದ ಕೂಡಲೆ ಆ ಒಡತಿ ಜೇಬಿಂದ ಒಂದು ಪ್ಲಾಸ್ಟಿಕ್ ಕವರನ್ನು ತೆಗೆದು ತನ್ನ ನಾಯಿಯ ಕಕ್ಕವನ್ನು ಯಾವ ಮುಜುಗರ ಇಲ್ಲದೆ ಮತ್ತು ಮುಖ ಕಿವುಚದೆ ಅದರೊಳಗೆ ತುಂಬಿ ಅಲ್ಲೆ ಹತ್ತಿರದಲ್ಲೆ ಇದ್ದ petwaste ಎಂಬ ಡಬ್ಬದೊಳಕ್ಕೆ ಬಿಸಾಕಿ ತನ್ನ ನಾಯಿಯನ್ನು ಮುದ್ದಿಸುತ್ತ ಹೋದಳು!! ನಮ್ಮ ದೇಶದಲ್ಲಿ ಬಹಳ ಜನರು ತಮ್ಮ ಮಕ್ಕಳ ಹೇಸಿಗಯನ್ನು ಶುಚಿಗೊಳಿಸಲು ಆಯಾ ಅಂಥವರನ್ನು ಈಗಿನ ಕಾಲದಲ್ಲಿ ನೇಮಿಸಿಕೊಂಡಿರುತಾರೆ! ಇಂಥ ಕಾಲದಲ್ಲಿ ಇದನ್ನು ನೋಡಿದ ನಾನೆ ಒಂದು ಕ್ಷಣ ಅವಾಕ್ಕಾದೆ. ಫೋನಲ್ಲಿ ನನ್ನ ಗೆಳೆಯ ಹಲೊ ಹಲೊ ಅಂಥ ಅರಚುತ್ತಿದ್ದ!!ಅವನಿಗೆ ಇದನ್ನು ಹೇಳಿ ಬೈಸಿಕೊಂಡೆ!ನಂತರ ನನ್ನ ಅಪಾರ‍್ಟ್ ಮೆಂಟ್ ಕಟ್ಟಡದ ಒಳಗೆ ಇಂಥಹ ಹಲವು ಡಬ್ಬಗಳನ್ನು ಕಂಡೆ! ಅಲ್ಲೆ ಪ್ಲಾಸ್ಟಿಕ್ ಕವರ್ ಗಳನ್ನು ಇಟ್ಟಿರುವುದೂ ನೋಡಿದೆ.ನನ್ನ ಇತರ ಸ್ನೇಹಿತರ ಜೊತೆ ಮಾತನಾಡುವಾಗ ತಿಳಿಯಿತು ಇದು ಇಲ್ಲಿನ ನಿಯಮ ಅಂತ..ಈ ನಿಯಮವನ್ನು ಪಾಲಿಸದಿದ್ದರೆ ದಂಡ ವಿಧಿಸುತ್ತಾರೆ ಮತ್ತೆ ನಾಯಿಯನ್ನು ಸಾಕುವ ಅನುಮತಿಯನ್ನು ಕಿತ್ತುಕೊಳ್ಳುವರೆಂದು! ನಾನು ಅಯ್ಯೊ..ಇದೆನಪ್ಪ ನಾಯಿ ಸಾಕಲು ಕೂಡ ಇಲ್ಲಿ ದೊಣ್ಣೆ ನಾಯಕನ ಅಪ್ಪಣೆಯೇ ಎಂದು ಅನಿಸಿತು!! ಆಮೇಲೆ ತಿಳಿಯಿತು ಅದಕ್ಕೂ ಇಲ್ಲಿ ಅನುಮತಿ ಬೇಕು. ಅಲ್ಲದೆ ಕಾಲ ಕಾಲಕ್ಕೆ ಅದಕ್ಕೆ ಲಸಿಕೆ ಕೊಡಿಸುವುದು ಕೂಡ ಕಡ್ಡಾಯ ಅಂತ. ಆಮೇಲೆ ಅದು ಜಾಸ್ತಿ ಬೊಗಳುತ್ತದೆ, ತರಲೆ ಮಾಡುತ್ತದೆಂದು ಅದಕ್ಕೆ ಸಿಕ್ಕಪಟ್ಟೆ ಹೊಡೆದು ಬಡಿದು ತಮ್ಮ ಗಂಡ/ಹೆಂಡತಿ ಮೇಲಿನ ಕೋಪ ಅದರ ಮೇಲೆ ತೀರಿಸಿಕೊಳ್ಳಲು ಶುರು ಹಚ್ಕೊಂಡ್ರೋ,ಅಂಥವರ ಮೇಲೆ pet violence ಅಂತ ಕೇಸು ಜಡಿದು ಒಳಗೆ ದಬ್ಬುತ್ತಾರೆಂದು ತಿಳಿಯಿತು!..ನನಗೆ ಆಗ ಅನ್ನಿಸಿತು.. ಆಹಾ ಎಂಥ ಒಳ್ಳೆಯ ವ್ಯವಸ್ಥೆ ಇಲ್ಲಿ ಎಲ್ಲದಕ್ಕೂ ಅಂತ. ಒಂದು ಕ್ಷಣ ನನ್ನ ಮನಸಿನಲ್ಲಿ ನಮ್ಮ ದೇಶದಲ್ಲಿರೊ ಬಹಳಷ್ಟ ಸಾಕು ನಾಯಿ ಮತ್ತೆ ಅದರ ಮಾಲಿಕರ ಚಿತ್ರ ಸುಳಿಯಿತು. ಬೆಳಿಗ್ಗೆ ವಾಕಿಂಗೆ ಹೋಗೋವಾಗ ಯಾರದೊ ಮನೆಯ ಮುಂದೆ ಅದು ಹೇಸಿಗೆ ಮಾಡಿದರೂ ತಮ್ಮ ಕಣ್ಣಿಗೂ ಕಾಣದಂತೆ ಇರುವ ಕೆಲವು ಮಂದಿ, ಸರಿಯಾಗಿ ಅವುಗಳಿಗೆ ಊಟ, ತಿಂಡಿ ಕೊಡದೆ ಎಲ್ಲೋ ಮೂಲೆಯಲ್ಲಿ ಅದನ್ನು ಕಟ್ಟಿಹಾಕಿ ಹೊಡೆದು ಹಿಂಸಿಸೋ ಇನ್ನು ಕೆಲವರು. ಮೈಸೂರಲ್ಲಿ ಒಂದು ದಿನ ನನಗೂ ಮತ್ತೆ ಹೀಗಿರೊ ನಾಯಿ ಮಾಲಿಕರ ಜೊತೆ ಭಯಂಕರ ಜಗಳ ನಡೆದಿತ್ತು! ಅದೂ ಆ ಮನುಷ್ಯ ದಿನವೂ ಬೆಳಿಗ್ಗೆ ೬ ಗಂಟೆ ಮುಂಚಿತವಾಗಿಯೇ ಹೀಗೆ ನನ್ನ ಮನೆಯ ಗೇಟಿನ ಮುಂದೆ ಪ್ರಸಾದವನ್ನು ತನ್ನ ನಾಯಿಯ ಮೂಲಕ ನಮಗೆ ಇರಿಸಿ ಕಾಣೆಯಾಗಿ ಬಿಡುತ್ತಿದ್ದ. ಒಂದು ದಿನ ನಾನು ೫.೩೦ ಗಂಟೆಗೆ ಎದ್ದು ಕಾದು ಅವನಿಗೆ ಮಂಗಳಾರತಿ ಎತ್ತಿ ಕಳಿಸಿದ್ದೆ! ಇಲ್ಲಿ ಮೇಲೆ ಹೇಳಿದ ವ್ಯವಸ್ತೆಗಳನ್ನು ನಮ್ಮ ದೇಶದಲ್ಲೂ ಅಳವಡಿಸಿಕೊಂಡು ಜನರಿಗೆ ತಿಳಿ ಹೇಳಿದರೆ ಎಷ್ಟು ಚೆನ್ನ ಅಲ್ಲವೆ? ಏನು ಗುರೂ ಇವನು..ಒಂದು ಸಲ ಅಮೆರಿಕೆ ನೋಡಿ ಅಲ್ಲಿರೊ ವ್ಯವಸ್ಥೆಗಳನ್ನು ಹೊಗಳಿಕ್ಕೆ ಹೊರಟಿದ್ದಾನೆ. ಅಮೆರಿಕೆ ಹಾಗಿದೆ ಹೀಗಿದೆ ಎಂದು ಬುರುಡೆ ಬಿಡೋದ್ರಲ್ಲಿ ಇವನೂ ಒಬ್ಬ ಅಂಥ ತಿಳಿಯಬೇಡಿ!! ಏನೊ ಈ ಮೂಕ ಪ್ರಾಣಿಗಳನ್ನು ಕಂಡರೆ ನನಗೆ ಸ್ವಲ್ಪ ಪ್ರೀತಿ ಜಾಸ್ತಿ..ಇಲ್ಲಿ ಕೂಡ ಹುಳುಕು ಇಲ್ಲವೆಂದಲ್ಲ. ಆದರೆ ಇಲ್ಲಿರೋ ಕಾನೂನು ಕಟ್ಟು ಪಡೆಗಳನ್ನು ನೋಡಿದರೆ ಅಂಥಹ ಹುಳುಕು ಕಮ್ಮಿ ಅಂಥ ನನ್ನ ಅನಿಸಿಕೆ. ಅಲ್ಲದೆ ಬಹಳ ಜನ ಇವುಗಳನ್ನು ಮಕ್ಕಳ ಹಾಗೆ ಮುದ್ದು ಮಾಡುವುದನ್ನು ನೋಡಿದರೆ ಖುಷಿಯಾಗುತ್ತದೆ! ಇನ್ನೊಂದು ಹೇಳುವುದನ್ನು ಮರೆತೆ. ನಮ್ಮ ಮಕ್ಕಳಿಗೆ Day Care ಇರೊ ಹಾಗೆ ನಾಯಿಗಳಿಗೂ ಇಲ್ಲಿ Day Care ಗಳಿವೆ!!! ನನ್ನ ಆಫೀಸಿನ ಹತ್ತಿರವೇ ಒಂದು ಇದೆ. ಗಂಡ ಹೆಂಡತಿ ಇಬ್ಬರೂ ಕೆಲಸಕ್ಕೆ ಹೋಗುವವರು ಇಲ್ಲಿ ಬೆಳಿಗ್ಗೆ ಬಿಟ್ಟು ಸಂಜೆ ಕರೆದುಕೊಂಡು ಹೋಗುತ್ತಾರೆ..ಹೋಗೊವಾಗ ಅವು ಮೂತಿಯನ್ನು ಅರ್ಧ ತೆರೆದ ಕಾರಿನ ಕಿಟಕಿಯಿಂದ ಹೊರಗೆ ಹಾಕಿ ಬೌ ಬೌ ಅನ್ನೋದನ್ನು ನೋಡಿದಾಗ ಅವು ಯಾರಿಗೆ ಟಾ ಟಾ ಹೇಳುತ್ತಿವೆಯೊ ಅಂಥ ಅನಿಸಿ ಒಂಥರ ಖುಷಿಯಾಗುತ್ತದೆ!! ಇದನ್ನೆಲ್ಲ ಮಾಡಿ ಒಂದು ನಾಯಿಯನ್ನು ಸಾಕಬೇಕೆಂದರೆ ಎಷ್ಟು ರೊಕ್ಕ ಅಂಥ ಮಾತ್ರ ಕೇಳಬೇಡಿ!! ಅದಕ್ಕೆ ಇದನ್ನೆಲ್ಲ ನೋಡಿ ಇಲ್ಲಿ ಒಂದು ನಾಯಿ ಮರಿಯನ್ನು ತಂದು ಸಾಕುವ ಯೋಚನೆ ಮನಸ್ಸಿಂದ ಹಾರಿ ಹೋಗಿತ್ತು!! ಹೆ.ಹೇ!..

ನನ್ನ ಊರು!

2009-07-03T12:31:00.000-07:00

ನಾ ಹುಟ್ಟಿದ್ದು ಕೋಲಾರ ಎಂಬ ಚಿನ್ನದ ಗಣಿಯಲ್ಲಿ
ಬೆಳೆದು ಓಡಾಡಿದ್ದು ಮೈಸೂರು ಎಂಬ ಅರಮನೆಯಲ್ಲಿ
ಈಗಿರುವುದು ಬೆಂಗಳೂರು ಎಂಬ ಸಾಫ಼್ಟ್ ವೇರ್ ಕಣಿವೆಯಲ್ಲಿ!

ಭಟ್ಟಂಗಿಗಳ ಕನ್ನಡ ಪ್ರೇಮ!

2009-07-03T10:50:00.000-07:00

ಸ್ನೇಹಿತರೆ..ನನಗೆ ಗೊತ್ತು..ನೀವೆಲ್ಲಾ ಏನು ಯೋಚಿಸುತ್ತಿದ್ದೀರೆಂದು!!ಎಲ್ಲಿದ್ದ ಈ ಬಡ್ಡಿಮಗ ಇಷ್ಟು ದಿನ ಇವನು..ಇದ್ದಕ್ಕಿದ್ದಂತೆ ಬಂದು ಬ್ಲಾಗ್ನಲ್ಲಿ ಏನೋ ಚುಟುಕ ಕವನ ಅಂತ ಅದೂ ಇದೂ ಆಳೂ ಮೂಳು ಹಾಕುತಾ ಇದ್ದಾನೆ ಅಂತ..ಸುಮಾರು ೧ ವರ್ಷದ ಹಿಂದೆ ಶುರು ಮಾಡಿದ್ದೆ ಹೀಗೆ ಏನನ್ನಾದರೂ ಬರೆಯಬೇಕು ಅಂತ..ಏಕೆಂದರೆ ಕನ್ನಡದಲ್ಲಿ ಏನಾದರೂ ಬರೆಯಬೇಕು ಅಂತ ನನಗೂ ಮೊದಲಿಂದಲೂ ಆಸೆ..ಆದರೆ ಏನು ಮಾಡೋದು..ಆರ್ಥಿಕ ಹಿಂಜರಿತ ಮಣ್ಣು ಮಸಿ ಅಂತ ನಮ್ಮಂಥವರ ವೃತ್ತಿಗೇ ಕುತ್ತು ಬಂದಿರುವಾಗ, ಇನ್ನು ಬ್ಲಾಗು ಅದು ಇದು ಅನ್ನೊ ಪ್ರವೃತ್ತಿಗೆ ಸ್ವಲ್ಪ ಫ಼ುಲ್ ಸ್ಟಾಪ್ ಬಿದ್ದಿತ್ತು!..ಈಗ ಈ ನನ್ಮಗನಿಗೆ ಇದ್ದಕ್ಕಿದ್ದಂತೆ ಏನಾಯ್ತು ಅಂತ ಕೇಳ್ತಿರಾ ಅಂತ ನನಗೆ ಗೊತ್ತು. ಇದಕ್ಕೆಲ್ಲಾ ಕಾರಣ ನನ್ನ ಸ್ನೇಹಿತನಾದ ಶಂಕರ ಅವರ ಒಂದು ಬ್ಲಾಗು sampada.net ನಲ್ಲಿ ಎಂಥ ಚರ್ಚೆಯ ವಸ್ತುವಾಯಿತು ಅಂದ್ರೆ ನೀವು ಅಲ್ಲಿ ಹೊಕ್ಕಿ ಆ ಲೇಖನಕ್ಕೆ ಹರಿದು ಬಂದ ವಿಮರ್ಶೆಗಳನ್ನು ಓದಬೇಕು. ಮತ್ತೆ ಅಲ್ಲಿರೋ ಆ.ಸು.ಹೆಗ್ಡೆ ಎಂಬ ವ್ಯಕ್ತಿ ಅವರು ರಚಿಸಿದ ಒಂದು ಕವನ ಮತ್ತೆ ನಾನು ಅದಕ್ಕೆ ನೀಡಿದ ವಿಮರ್ಶೆಗಳನ್ನು ನೋಡಬೇಕು.ಇವರು ಬಹಳ ಚೆನ್ನಾಗಿ ಬರೆಯುತ್ತಾರೆ ಒಂಬುದರಲ್ಲಿ ಎರಡು ಮಾತಿಲ್ಲ. ನಾವೆಲ್ಲ ಇನ್ನು ಬಚ್ಚಾಗಳು ಅಂತಾರಲ್ಲ ಹಾಗೆ. ಆದರೆ ಈ ಕವನಕ್ಕೆ ಸುತಾರಾಂ ನನ್ನ ಸಹಮತವಿಲ್ಲ. ಕನ್ನಡವನ್ನು ಸತ್ತು ನಾರುತಿದೆ ಅಂತೆಲ್ಲ ಬರೆದಿದ್ದರಿಂದ ನನಗೆ ಯಕ್ಕಾ ಮಕ್ಕಾ ಕೋಪ ಬಂತು. ಅದಕ್ಕೆ ನಾನು ಹಿಗ್ಗಾಮುಗ್ಗಾ ಟೀಕಿಸಿದೆ.ಅದಕ್ಕೆ ಅವರ ಭಟ್ಟಂಗಿಗಳ ವಿಮರ್ಶೆಗಳನ್ನು ನೋಡಿದರೆ ಈಗಲೂ ನಗು ಬರುತ್ತದೆ.
http://sampada.net/blog/asuhegde/01/07/2009/22144
ನಾನು ಸ್ವಲ್ಪ ಜಾಸ್ತಿಯಾಗೆ ವೈಯುಕ್ತಿವಾಗಿ ಟೀಕಿಸಿದೆ ಅನ್ಸುತ್ತೆ. ಏಕೆಂದರೆ ಶಂಕರ ಅವರ ಹಾಗೆ ನನ್ನದು ಬಿಸಿರಕ್ತ! ಕನ್ನಡ ಭಾಷೆ ನನಗೆ ಒಲಿದಿದೆ ಎಂದು ಏನು ಬೇಕಾದರು ಬರೆಯುವೆ ಅನ್ನೊದು ಅವರ ಧೋರಣೆ ಅಂತ ಕಾಣುತ್ತೆ. ಅದಕ್ಕೆ ಅವರು ನನ್ನ ಅಲ್ಲಿಂದ ಹೊರಕ್ಕೆ ಕೂಡ ದಬ್ಬಿದ್ದಾರೆ!! ಅವರಿಂದ ಹೊರ ದಬ್ಬಿಸಿಕೊಂಡ ನನಗೆ ಇವರದೊಂದೆ ಕನ್ನಡ ಸಮುದಾಯವೇ, ಇದನ್ನು ಹುಟ್ಟಿ ಹಾಕಿದ ನಾಡಿಗ್ ಮತ್ತು ಇಲ್ಲಿನ ತುಂಬಾ ಹಿರಿಯ ಸದಸ್ಯರುಗಳಾದ ಹೆಗ್ಡೆ,ಬಾಳಿಗಾ ಅವರ ಧೋರಣೆ ನೋಡಿ ಬೇಜಾರಾಗಿ ಮತ್ತು ಇವರು ಬರೆದುದಕ್ಕೆಲ್ಲ ಬಹುಪರಾಕ್ ಹಾಕೊ ನಾಗೇಂದ್ರ,ಭಾಸ್ಕರ,ವಿನಯ ಅನ್ನೊ ಭಟ್ಟಂಗಿಗಳ ವರ್ತನೆ ನನ್ನಲ್ಲಿ ಸಿಕಾಪಟ್ಟೆ ಕೋಪ ಉಕ್ಕಿಸಿತು.ಈ ಭಟ್ಟಂಗಿಗಳು ಬರೆದ ಬ್ಲಾಗ್ ಗಳನ್ನು ಓದಿದ ಮೇಲೆ ನನಗೆ ಅನ್ನಿಸಿತು,ಇಂಥ ಡಬ್ಬಾ ನನ್ಮಕ್ಳೆಲ್ಲ ತಲೆಗೆ ತೋಚಿದ್ದನ್ನು ಗೀಚಿ ಸಂಪದದಲ್ಲಿ ಮಹಾ ಪಂಡಿತರ ಹಾಗೆ ವರ್ತಿಸಿಬಹುದಾದರೆ ನನ್ನಲ್ಲಿರುವ ಕನ್ನಡ ಪ್ರತಿಭೆಯನ್ನು ಸ್ವಲ್ಪ ಹೊರಹಾಕಿದರೆ ಇವರು ಗೀಚಿದಕ್ಕಿಂತ ಸಾವಿರ ಪಾಲು ಉತ್ತಮವಾಗಿರುತ್ತದೆ ಅಂತ ಅನಿಸಿತು!! ಹೀಗೆ ಬೇರೆಯವರು ಬರೆದುದಕ್ಕೆಲ್ಲಾ ಬಹೊಪರಾಕ್ ಹಾಕಿ ಕನ್ನಡ ಪ್ರೇಮ ತೋರಿಸುವುದಕ್ಕಿಂತ ನಾನು ನನ್ನ ಬ್ಲಾಗ್ ನಲ್ಲಿ ನನ್ನದೆ ಆದ ಅನಿಸಿಕೆಗಳನ್ನ ಹಂಚಿಕೊಳ್ಳುವುದು ಲೇಸೆನಿಸಿತು!! ಹೀಗೆ ನಾನು ಬರೆದ ಮತ್ತೆ ತಲೆಯಲ್ಲಿದ್ದ ಕೆಲವನ್ನು ಹೊರ ತರಿಸಿದ್ದಕ್ಕೆ ನಾನು ನಿಜಕ್ಕೂ ಸಂಪದ ಅವರಿಗೆ ಚಿರಋಣಿ!ಏನಂತೀರಾ..

ವರ!

2009-07-03T09:25:00.000-07:00

ಕರುಣಿಸು ಅಂದಳು ಮದುವೆಗೊಬ್ಬ ವರ
ಒಪ್ಪೆನು ಅಂದಳು ಸಾಮಾನ್ಯವಾದ ವರ
ಬೇಕು ಅಂದಳು ಡಾಕ್ಟರ್/ಇಂಜಿನಿಯರೆಂಬ ವರ!

ಸೊಂಟ!

2009-07-03T08:06:00.000-07:00

ಹರಿಯಿತು ಎದುರಲ್ಲಿದ್ದ ಸೊಂಟದ ಮೇಲೆ ನನ್ನ ಕುಡಿನೋಟ
ಬೆದರಿಸಿತು ಪಕ್ಕದಲ್ಲಿದ್ದ ನನ್ನಾಕೆ ಕಂಗಳ ಕಿಡಿನೋಟ
ನನಪಿಸಿತು ಮಾರುದ್ದದ ಈಕೆಯ ಅಡುಗೆಮನೆ ಸೌಟ!

ಜ್ವರ

2009-07-03T08:02:00.000-07:00

ಬಾಲ್ಯದಲಿ ಕಾಡಿತು ಪರೀಕ್ಷೆಯ ಜ್ವರ
ಯೌವ್ವನದಲಿ ಕಾಡಿತು ಪ್ರೇಮದ ಜ್ವರ
ಈಗ ಕಾಡುತಿದೆ ಬರೀ ಹಂದಿ ಜ್ವರ!

ನನ್ನ ಬ್ಲಾಗಾಯಣದ ಮೊದಲ ದಿನ......

2008-06-13T13:37:00.002-07:00

ಅಹಾ...ಬಹಳ ದಿನಗಳದಿಂದ ನನ್ನ ಮನಸಿನಲ್ಲಿ ಕೊರೆಯುತಿದ್ದ ಈ ಬ್ಲಾಗ್ ಎಂಬ ಯೋಚನೆಗೆ ಇವತ್ತು ಮುಕ್ತಿ ಸಿಕ್ಕಿತು... nಅನ್ನದೇ ಆದ ಒಂದು ಬ್ಲಾಗ್ ಮಾಡಬೇಕೆಂಬ ಆಸೆ ಇವತ್ತು ಪೂರೈಸಿದೆ...
ಈ ಸಲ ವೀಕೆಂಡ್ ನಲ್ಲಿ ಏನು ಮಾಡೋದು ಅಂಥ ಆಫೀಸ್ ನಲ್ಲೆ ಸ್ಕೆಚ್ ಹಾಕುತಿರುವಾಗ ಈ ಯೋಚನೆ ಬಂದು ಅಲ್ಲೇ ಆಫೀಸ್ ನಲ್ಲೆ ಕುಂತು ಒಂದು ಬ್ಲಾಗ್ ಓಪನ್ ಮಾಡಿಬಿಟ್ಟೆ...ಮಾಡಕ್ಕೆ ಬೇರೆ ಕೆಲಸ ಇದ್ರು ಈ ಫ್ರೈಡೆ ಬಂದ್ರೆ ಸಾಕು..ಆಫೀಸ್ ನಲ್ಲಿ ಯಾರಿಗೂ ಕೆಲಸ ಮಾಡಕ್ಕೆ ಮೂಡ್ ಇರೋದಿಲ್ಲ!! ಎಲ್ಲರಿಗೂ ಬೇಗ ಮನೆಗೆ ಹೋಗೋದೇ ಚಿಂತೆ...ಮನೆಗೆ ಹೋಗಿ ಕಡಿದು ಗುಡ್ಡೆ ಹಾಕೋದು
ಅಷ್ಟೇ ಇದೆ..ಅದು ಬೇರೆ..ಅದ್ರೆ ಆಫೀಸ್ ನಲ್ಲಿ ಮಾತ್ರ ೫ ಗಂಟೆ ತನಕ ಇರೋಕ್ಕೆ ಯಾರಿಗೂ ಅಂಡು ಊರೊದಿಲ್ಲ..ಹೀಗೆ ಇನ್ನು ಮುಂದೆ ಕುಂತು ಎಲ್ಲರಿಗೂ ಯಾವುದಾದರು ವಿಷಯದ ಮೇಲೆ ತಲೆ ಕೊರೆಯೋಣ ಅಂಥ ಇದ್ದೀನಿ..ಅಲ್ಲಿಯ ತನಕ ಇಷ್ಟು ಸಾಕು ಅನ್ಸುತ್ತೆ..